تصريحات حسام حبيب
خرج الفنان حسام حبيب عن صمته ليعلق على تصريحات صحفية منسوبة لطليقته الفنانة شيرين عبدالوهاب، التي استغاثت فيه منه واتهمته بسرقة مصوغات ذهبية وابتزازها مادياً. نشر موقع “ET بالعربي” تسجيلاً صوتياً لحسام حبيب يشرح فيه تفاصيل الموقف ويؤكد لجوءه للقضاء.
نفي الاتهامات وتوضيح الموقف
قال حسام حبيب: “أنا فاهم جدًا اللي بيحصل، والناس عندها حق تزهق، لكن والله العظيم ده مش أنا، والتصرفات دي أنا بريء منها تمامًا. مستغرب أكتر منكم باللي بيحصل. ممكن يكون ده حصل لأنها بقالها يومين أو تلاتة بتحاول تتصل بيا وأنا رفضت. بعد الأحداث الأخيرة رفضت تمامًا وقلت خلاص مش هينفع كل مرة أسامح، ومع ذلك ما تكلمتش والنتيجة هي هي. كل دي حاجات يحاسب عليها القانون وكل دي اتهامات كاذبة. بإذن الله، القانون هو اللي هياخد مجراه”.
استغراب من الاتهامات
وأضاف: “موضوع التحويل المالي ده، يا إما أنا لسه جوزها وبكدب على الناس، يا إما بتكدب على البنك، يا إما هي بتدلعني. وفي حد يخلي حد يدفع فلوس غصب عنه؟ مش عارف أقول إيه. اللي بيقولوا أنا سرقت خزنة وسرقت تحويل بنكي، خدتهم إزاي؟ كنت شبح جوه البنك ولا لبست طاقية الإخفاء؟ كل مرة سرقة وكلام أقل بكتير من أني أعلق عليه. أنا تعبت، أنا بستنجد بالناس وبكل حد يقدر يساعدني. وكل الناس المحترمين في الوطن العربي، ارحموني منها. ده ذنب أنا عملته في حياتي معرفش إيه ده”.
تأكيد براءة وتصميم على المواجهة
واختتم حسام حبيب تعليقه قائلاً: “أنا لسه هطلع أتكلم بكل التفاصيل. ده مش تهديد ومش بقول كده عشان أخوفها، لكن ده حقي وبقالي سنين مش عايز آخده. عمالين يتكلموا على سمعتي وسمعة أهلي. الحمد لله، أنا متربي كويس ومن عائلة كويسة جداً، ومتعلم في أماكن كويسة جداً وبعرف ربنا سبحانه وتعالى. اللي بيخاف ربنا ميعملش كده. عايز أفهم يعني إيه سرقت تحويلها البنكي؟ الاتهام ده عبارة عن إيه؟ هي بتستقوى بالناس وبتستقوى باللي ربنا ادهولها على الناس. دايماً تهددني لو ماردتش هعمل كذا. أرجوكم، ما تبقوش سلاح في إيد حد بيظلم حد وعايز يجبره على حاجة هو مش عايزها”.
